究竟戒賭輔導中心日常工作係乜？

喺觀賞完首輪初賽後，聽到唔少同學仔都喺比賽中提及過香港嘅幾間戒賭中心，同埋戒賭中心所提供嘅服務。好多人都有提起戒賭中心係幫助受賭博問題困擾嘅人士，但你又知唔知係點樣幫？不如趁呢個機會，了解一下我地勗勵軒輔導中心有咩服務，同埋戒賭輔導中心嘅日常運作啦！

1. 接聽熱線

不論是有賭博問題嘅人士或佢地嘅家屬，都會打來熱線求助。接聽熱線最主要係提供即時情緒支援、提供相關資訊(有不少求助者會係電話入面問及一D資訊性問題，例如申請破產程序等等) 、同埋運用輔導技巧以加強佢地願意接受輔導嘅動機。點解打得電話來，仲要係電話上加強佢地嘅求助動機? 其實往往有一部份嘅求助者打電話上來，係因為當下受到賭博問題困擾，想有人去傾，但未必想接受戒賭心理治療。佢地可能已經覺察(aware)到自己有狀況出現，但未必有動機(motivation) 去接受戒賭心理治療。點解會未動機去接受戒賭心理治療? 原因可以有好多，下回再分解啦!

2. 提供戒賭心理輔導/治療

部份求助人士係電話入面同我地傾談過後，都會願意上來中心接受單對單的戒賭心理治療。無一套心理治療嘅方法能夠適合所有有賭博問題嘅人士。認知行為治療 (Cognitive Behavioral Therapy) 、精神動力治療 (Psychodynamic Therapy) 、家庭治療 (Family Therapy)等等都有機會成為適合求助者嘅心理治療手法。用邊一個手法往往取決於兩大因素: 提供輔導者嘅訓練背景同埋求助者嘅實際情況需要。

3. 提供支援小組 (Supporting group)

我地亦都設有不同類型嘅支援小組，以加強求助者係戒賭路上嘅支援同成效。或者有人會問，如果想戒賭，個別輔導同支援小組邊種比較好? 其實，個別單對單式的輔導 (Individual Counselling) 主要協助求助者處理個人層面議題。而支援小組就以個別特定主題為中心，我地會同參與者會係呢個特定主題上共同作出分享同討論，透過耹聽組內不同組員嘅睇法同經驗，從而有所得著。

4. 展外探訪

大家或者會覺得，要係中心等人打電話入來，好似好被動。無錯，為左主動去發掘一D服務需要者，某D戒賭中心會有展外探訪服務。就好似我地勗勵軒錦，由於係前線工作入面發現求助者絕大部份來自五大行業，所以我地都會定期針對呢五大行業進行展外探訪。至於展外探訪實際係做d乜? 五大行業又係邊五大? 下回再分解啦!

5. 大眾教育

正所謂預防勝於治療，我地亦都會去唔同嘅地方，包括學校、商業機構甚至係直接落區，推廣防賭及心理健康嘅訊息。